Ka përfunduar me sukses cikli i radhës i trajnimeve për “Vlerësimin e Riskut” dhe “Planifikimin për Menaxhimin e Riskut nga Fatkeqësitë” në Qarkun e Kukësit.
Gjatë datave 17-19 Dhjetor, përfaqësues nga bashkitë e Qarkut Kukës morën pjesë në një seri seancash të strukturuara dhe intensive trajnimi, të organizuara për të rritur aftësitë dhe kompetencat e tyre në drejtim të menaxhimit të riskut dhe fatkeqësive në nivel lokal.
Programi i trajnimit përfshinte një total prej 10 modulesh të detajuara dhe të përshtatura për rolet dhe përgjegjësitë specifike të stafit pjesëmarrës.
Modulet mbuluan tema kyçe si:
“Metodologjia e Vlerësimit të Riskut”,
“Planifikimi i Menaxhimit të Riskut”,
“Planifikimi i Përgjigjes ndaj Emergjencave”,
“Komunikimi në situatat e fatkeqësive”, dhe
“Legjislacioni për Menaxhimin e Fatkeqësive në kontekstin e ndryshimeve klimatike”.
Gjithashtu, trajnimet adresuan në mënyrë të detajuar tipologjitë kryesore të fatkeqësive, duke përfshirë:
“Zjarret në pyje”, “Riskun e Përmbytjeve”, “Fatkeqësitë e lidhura me Sëmundjet Infektive”, “Riskun Sizmik, Gjeoteknik dhe Rrëshqitjet”, si dhe “Riskun Teknologjik dhe Industrial”.
Pjesëmarrësit patën mundësinë të diskutojnë sfida konkrete dhe të zhvillojnë plane veprimi për përmirësimin e përgatitjes dhe reagimit ndaj fatkeqësive.
Ky cikël trajnimesh përbën një hap të rëndësishëm drejt forcimit të kapaciteteve vendore dhe krijimit të një qasjeje gjithëpërfshirëse, duke garantuar mbrojtjen dhe sigurinë e komuniteteve në raste emergjencash.
