Titulli i projektit: “Fuqizimi i Qëndrueshmërisë Shqiptare përmes bashkëzbatimit të një Sistemi të Paralajmërimit të Hershëm Shumë Rreziqesh në mbarë vendin (EAR -MHEWS)”

Në kuadër të:

ALBAdapt – PROGRAMI PËR NJË ZHVILLIM URBAN REZISTENT NDAJ NDRYSHIMEVE KLIMATIKE NË SHQIPËRI

 

Titulli: Forcimi i gatishmërisë së shkollave dhe komuniteteve për Veprimin e Hershëm të Bazuar në Parashikime (FbA)

PËRMBLEDHJE E GRANTIT

Aplikoni tani!

Madhësia e grantit: Deri në 8,124,300 Lekë pa TVSH

Kush mund të aplikojë: Organizatat Jo Fitimprurëse (OJF) të regjistruara në Shqipëri

Shtrirja gjeografike: Shqipëria (12 bashki bregdetare)

Kohëzgjatja e projektit: 24 muaj

Afati i fundit për aplikim: 13 gusht 2026

RËNDËSIA E THIRRJES

Shqipëria është ndër vendet më të ekspozuara ndaj rreziqeve natyrore dhe ndikimeve të ndryshimeve klimatike. Përmbytjet, temperaturat ekstreme, zjarret në pyje dhe rreziqe të tjera natyrore mund të ndikojnë drejtpërdrejt në sigurinë dhe mirëqenien e komuniteteve.

Shkollat përfaqësojnë një nga institucionet më të rëndësishme për ndërtimin e kulturës së gatishmërisë ndaj emergjencave, ndërsa fëmijët janë ndër grupet më vulnerabël ndaj rreziqeve natyrore dhe klimatike. Për këtë arsye, forcimi i kapaciteteve të shkollave për planifikimin dhe menaxhimin e emergjencave është një element thelbësor për reduktimin e rrezikut nga fatkeqësitë.

Në kuadër të Programit ALBAdapt dhe projektit EAR-MHEWS, kjo thirrje synon të mbështesë organizatat e shoqërisë civile për zbatimin e aktiviteteve që forcojnë gatishmërinë e shkollave dhe komuniteteve përmes qasjes së Veprimit të Hershëm të Bazuar në Parashikime (Forecast-based Action – FbA).

Projekti “Fuqizimi i Qëndrueshmërisë Shqiptare përmes bashkëzbatimit të një Sistemi të Paralajmërimit të Hershëm Shumë Rreziqesh në mbarë vendin (EAR – MHEWS)” mbështetet financiarisht nga Fondi i Gjelbër për Klimën dhe qeveritë e Shqipërisë dhe Gjermanisë. Ai zbatohet nga Agjencia Kombëtare e Mbrojtjes Civile (AKMC) në kuadër të programit ALBAdapt – Zhvillim Urban i Qëndrueshëm ndaj Ndryshimeve Klimatike në Shqipëri, financuar nga Fondi i Gjelbër për Klimën, Ministria Federale Gjermane për Bashkëpunim Ekonomik dhe Zhvillim, Agjencia Zvicerane për Zhvillim dhe Bashkëpunim si dhe Sekretariati Zviceran për Çështjet Ekonomike dhe zbatuar nga GIZ Shqipëri.

PËRMBLEDHJA E THIRRJES

Agjencia Kombëtare e Mbrojtjes Civile (AKMC), në kuadër të Programit ALBAdapt dhe projektit “Fuqizimi i Qëndrueshmërisë Shqiptare përmes bashkëzbatimit të një Sistemi të Paralajmërimit të Hershëm Shumë Rreziqesh në mbarë vendin (EAR-MHEWS)”, shpall thirrjen për aplikime për grant.

Granti mbështet zbatimin e Aktivitetit 2.1.2 – Kalimi drejt Veprimit të Hershëm të Bazuar në Parashikime (Forecast-based Action – FbA), me fokus forcimin e kapaciteteve të komuniteteve shkollore dhe lokale në zonat bregdetare të Shqipërisë.

Projekti i financuar do të mbështesë aktivitete në 114 shkolla të përzgjedhura në 12 bashki bregdetare, duke kontribuar në zbatimin e Planeve të Menaxhimit të Emergjencave të bazuara në Veprimin e Hershëm sipas parashikimeve (FbA), që do të prodhohen në kuadër të programit ALBAdapt, dhe në përmirësimin e gatishmërisë, ndërgjegjësimit dhe komunikimit të hershëm të rrezikut

 

 

FUSHAT PRIORITARE TË FINANCIMIT

Projekt-propozimet duhet të mbulojnë detyrimisht të tre fushat prioritare të mëposhtme:

P.1. Trajnime dhe ushtrime praktike në shkolla

Kjo fushë synon forcimin e kapaciteteve të stafit shkollor dhe nxënësve për zbatimin e Planeve të Menaxhimit të Emergjencave të bazuara në Veprimin e Hershëm sipas Parashikimeve.

P.2. Aktivitete ndërgjegjësuese për nxënësit, prindërit dhe komunitetet

Kjo fushë synon rritjen e ndërgjegjësimit dhe gatishmërisë së komuniteteve shkollore dhe lokale për përballimin e rreziqeve natyrore dhe klimatike.

P.3. Komunikimi i hershëm i rrezikut

Kjo fushë synon identifikimin dhe promovimin e kanaleve dhe produkteve më efektive të komunikimit / njoftimit të hershëm të rrezikut për grupet e ndryshme të synuara.

 

REZULTATET KRYESORE TË PRITSHME

Përmes kësaj ndërhyrjeje synohet:

• Rritja e kapaciteteve të stafit shkollor dhe nxënësve për menaxhimin e emergjencave;
• Testimi dhe përmirësimi i Planeve të Menaxhimit të Emergjencave në shkolla të bazuar në Veprimin e Hershëm sipas Parashikimeve;
• Certifikimi i stafit shkollor në ndihmën e parë;
• Rritja e ndërgjegjësimit të nxënësve, prindërve dhe komuniteteve;
• Përmirësimi i komunikimit / njoftimit të hershëm të rrezikut;
• Forcimi i rezistencës së komuniteteve ndaj rreziqeve natyrore dhe klimatike.

 

KUSH MUND TË APLIKOJË?

Në këtë thirrje mund të aplikojnë Organizatat Jo Fitimprurëse (OJF) të regjistruara në Shqipëri si;

• Organizata komunitare;
• Organizata humanitare;
• Organizata mjedisore;
• Organizata që punojnë me grupe vulnerabël.

Aplikantët duhet:

• Të jenë të regjistruar ligjërisht në Shqipëri;
• Të kenë të paktën 7 vite eksperiencë operative;
• Të kenë kapacitete administrative dhe financiare për menaxhimin e grantit;
• Të kenë të paktën 5 vite eksperienca të ngjashme me thirrjen;
• Të mos jenë subjekt i procedurave të falimentimit apo hetimeve për mashtrim dhe korrupsion.

ÇFARË PËRFITON ORGANIZATA FITUESE?

Organizata e përzgjedhur do të përfitojë:

• Financim nga 7,000,000 Lekë pa TVSH deri në 8,124,300 Lekë pa TVSH
• Mbështetje për zbatimin e aktiviteteve në kuadër të projektit EAR-MHEWS;
• Mundësi bashkëpunimi me institucionet përgjegjëse në nivel qëndror dhe vendor;
• Kontribut të drejtpërdrejtë në forcimin e Sistemit Kombëtar të Paralajmërimit të Hershëm dhe Veprimit të Hershëm.

SI REALIZOHET PËRZGJEDHJA?

Procesi i përzgjedhjes zhvillohet në dy faza:

Faza 1 – Kontrolli administrativ

Verifikimi i dokumentacionit dhe kritereve të pranueshmërisë.

Faza 2 – Vlerësimi teknik

Projekt-propozimet do të vlerësohen sipas:

• Relevancës me objektivat e thirrjes;
• Ndikimit të pritshëm;
• Cilësisë teknike dhe metodologjisë;
• Qëndrueshmërisë së rezultateve;
• Integrimit të barazisë gjinore dhe përfshirjes sociale;
• Efektivitetit të kostove;
• Kapaciteteve të organizatës.

ÇFARË DUHET TË PËRGATISNI PËR APLIKIMIN?

Paketa e aplikimit përfshin:

• Formularin e Aplikimit;
• Formularin e Buxhetit;
• Matricën e Kornizës Logjike;
• Deklaratën e Financimit të Dyfishtë;
• Deklaratën e Konfliktit të Interesit;
• Deklaratën e të Drejtës së Autorit.

Aplikantët duhet gjithashtu të dorëzojnë dokumentacionin ligjor dhe financiar të kërkuar sipas Udhëzuesit për Aplikantët.

DOKUMENTAT E THIRRJES

Përpara aplikimit, ju lutemi të konsultoni:

• Udhëzuesin për Aplikantët;
• Formularin e Aplikimit;
• Formularin e Buxhetit;
• Matricën e Kornizës Logjike;
• Listën e dokumentave shoqërues të aplikimit.

 

PYETJE DHE SQARIME

Pyetjet lidhur me këtë thirrje mund të dërgohen deri më 03 gusht 2026 në adresën e e-mailit: info.ear-mhews@akmc.gov.al.

Përgjigjet dhe sqarimet do t’i dërgohen individualisht çdo organizate që ka drejtuar pyetjet.

 

AFATET KOHORE DHE KOHËZGJATJA

 

Faza	Data
Publikimi i thirrjes	14 korrik 2026
Afati për pyetje dhe sqarime	03 gusht 2026
Afati i fundit për aplikim	13 gusht 2026
Kontrolli administrativ	17 gusht 2026
Vlerësimi teknik	24 gusht 2026
Njoftimi i rezultateve	28 gusht 2026
Afati për ankimim	04 shtator 2026
Përgjigjet ndaj ankimimeve	11 shtator 2026
Nënshkrimi i kontratës	16 shtator 2026

Datat mund të pësojnë ndryshime, të cilat do të publikohen në faqen zyrtare të AKMC.

MËNYRA E APLIKIMIT

 

Aplikimet duhet të dorëzohen me postë sipas udhëzimeve të përcaktuara në Udhëzuesin për Aplikantët deri më datë 13 Gusht 2026, ora 16:30 në:

 

Protokolli i Agjencisë Kombëtare të Mbrojtjes Civile.

Adresa: Ministria e Mbrojtjes, “Rruga e Dibrës”, Garnizoni “Skënderbej”, Godina nr.36, Tiranë, Shqipëri

 

Aplikimet e plotësuara, me të gjithë dokumentat mbështetës, duhet të dorëzohen në 1 (një) kopje fizike.KUJDES! Aplikimet e dorëzuara pas këtij afati, nuk do të merren në shqyrtim por do të skualifikohen menjëherë.

APLIKONI TANI!

Për të shkarkuar paketën e aplikimit dhe dokumentat shoqërues, klikoni në lidhjet përkatëse të publikuara në këtë faqe.

LISTA E ANEKSEVE:

Udhëzues për aplikantët e grantit

Aneksi I: Formati i Aplikimit  Aneksi I_Formulari i Aplikimit

Aneksi II: Formati i Projekt-Buxhetit  Aneksi II_Formulari i Projekt-Buxhetit

Aneksi III: Matrica e Kornizës Logjike Aneksi III_Matrica e Kornizës Logjike

Aneksi IV: Deklarata e Financimit të Dyfishtë Aneksi IV_Formulari i Financimit te Dyfishte

Aneksi V: Deklarata e Konfliktit të Interesit  Aneksi V_Deklarata e Konfliktit te Interesit

Aneksi VI: Deklarata e të Drejtës së Autorit   Aneksi VI_Deklarata e te Drejtes se Autorit

Lista e Dokumentave Shoqërues të Aplikimit Lista-e-dokumentave shoqerues