Përfaqësues të Autoritetit Shtetëror për Informacionin Gjeohapësinor (ASIG) zhvilluan ditën e djeshme, në bashkëpunim me Agjencinë Kombëtare të Mbrojtjes Civile (AKMC), një takim me përfaqësues të Misionit Këshillimor të Mekanizmit Evropian të Mbrojtjes Civile (UCPM), me fokus rolin dhe kontributin e produkteve dhe shërbimeve satelitore në menaxhimin e emergjencave civile.

Gjatë diskutimeve u theksua rëndësia e përdorimit të të dhënave satelitore për evidentimin e dëmeve të shkaktuara nga zjarret në pyje, si dhe për parandalimin dhe zbulimin e hershëm të tyre, si një mjet kyç për rritjen e gatishmërisë dhe reagimit efektiv ndaj fatkeqësive natyrore.

Ky bashkëpunim përforcon angazhimin e përbashkët të institucioneve për forcimin e kapaciteteve kombëtare dhe përdorimin e teknologjive të avancuara në shërbim të mbrojtjes së jetës, mjedisit dhe pronës.