Në kuadër të bashkëpunimit me NATO-n, me qëllim rritjen e kapaciteteve të sistemit të Mbrojtjes Civile në Shqipëri, është mundësuar fillimi dhe implementimi i sistemit NICS, (CACHE– Command And Control for Health and Environmental Security). Ky projekt financohet nga zyra SPS në NATO dhe Shqipëria për herë të parë, drejton një projekt së bashku me ekipet e Gjeorgjisë dhe SHBA.
Më 14 dhe 15 tetor në Qendrën Kombëtare Operacionale të Emergjencave Civile (QKOEC), nën drejtimin e Agjencisë Kombëtare të Mbrojtjes Civile (AKMC), u zhvillua takimi ku morën pjesë përfaqësues nga grupi amerikan MIT, Grupi gjeorgjian, NATO, Shtabi i Përgjithshëm i Forcave të Armatosura (SHPFA), Agjencia Kombëtare e Shoqërisë së Informacionit (AKSHI) dhe Qendra e Inovacionit të Sigurisë dhe Mbrojtjes, takim ky i cili synon zhvillimin e kapaciteteve të teknologjisë së informacionit për menaxhimin e fatkeqësive në Shqipëri.
Aktiviteti dy-ditor pati si objektiv, shpjegimin e funksionalitetit të sistemit NICS (Sistemi i Gjeneratës së Ardhshme për Komandimin e Incidentit) në lidhje me monitorimin e operacionit, marrjen e të dhënave operacionale në kohë reale dhe mbështetjen e procesit të vendimmarrjes, identifikimin e tipareve teknike të infrastrukturës dhe teknikës së nevojshme për instalimin e këtij sistemi në AKMC, si dhe prezantimin mes tyre të ekipeve shqiptare, gjeorgjiane dhe amerikane.
Çfarë është NICS?
NICS është një platformë drejtimi e komandimi që mundëson koordinim dhe ndërveprim për reagim. Është i ndërtuar për të përmirësuar njohjen e situatës dhe koordinimin e forcave operacionale, si dhe ndërveprimin e strukturave dhe agjencive të ndryshme në reagimin ndaj fatkeqësisë dhe emergjencave, pavarësisht llojit dhe përmasave të tyre. Është krijuar për institucionet dhe strukturat e sistemit të mbrojtjes civile në nivel qendror dhe vendor si, ministritë e linjës, institucionet qendrore, strukturat operacionale, prefekturat dhe bashkitë për të mbështetur aktivitetet e gatishmërisë, planifikimit, reagimit dhe rimëkëmbjes.
